စိတ်ကိုပိတ်ထားသူနဲ့ ဖွင့်ထားသူ (သို့)
Fixed Mindset 🆚 Growth Mindset အကြောင်း
Fixed Mindset ဆိုတာဘာလဲ❓
ကိုယ့်စိတ်ကို အိမ်တစ်လုံးလို့ မှတ်ယူကြည့်လိုက်ပါ။ Fixed Mindset ဆိုတာ အိမ်တံခါးကို ပိတ်ထားလိုက်တာနဲ့ တူပါတယ်။ ဒီလိုမျိုး ပုံသေစိတ်ထား ရှိသူတွေဟာ-
◾ ပါရမီရှင် အယူအဆကို လက်ခံသူတွေ ဖြစ်တယ်။ အရည်အချင်းဆိုတာ ကြိုးစားအားထုတ်မှုတွေ၊ ဇွဲလုံ့လရှိမှုတွေထက် မွေးကတည်းက ပါလာတာလို့ ယုံကြည်လက်ခံလေ့ရှိကြတယ်။
◾ ကိုယ့်ကိုယ်ကိုယ် စိန်ခေါ်ရတာ မကြိုက်ဘူး။ နေသားကျပြီးသား လက်ရှိအနေအထားလေးကို ဆုံးရှုံးသွားမှာ ကြောက်တဲ့စိတ်ကြောင့် ကိုယ်သက်တောင့်သက်သာရှိတဲ့ ဇုန်လေးထဲမှာပဲ ပျော်မွေ့နေလေ့ရှိကြတယ်။
◾ အထိမခံ ရွှေပန်းကန်နဲ့တူတယ်။ အကြံပြုချက်တွေကို လက်ခံနိုင်စွမ်း မရှိဘူး။ ဝေဖန်ထောက်ပြမှုတွေကနေ ကိုယ့်ကိုယ်ကိုယ် သုံးသပ်ပြီး တိုးတက်အောင် ကြိုးစားမဲ့အစား ဆင်ခြေပေးတုံ့ပြန်ဖို့သာ လုပ်ဆောင်တတ်ကြတယ်။
ဒါဆို Growth Mindset ဆိုတာကရော❓
အပေါ်က ဥပမာအတိုင်း စိတ်ကို အိမ်တစ်လုံးလို့ သတ်မှတ်မယ်ဆိုရင် Growth Mindset ရှိသူတွေက အိမ်တံခါး ဖွင့်ထားသူတွေနဲ့ တူပါတယ်။ ဒီလိုမျိုး တိုးတက်တဲ့စိတ်ထား ရှိသူတွေဟာ -
◾ ဘဝအတွေ့အကြုံတိုင်းကို သင်ယူမှု အခွင့်အလမ်းတွေအဖြစ် မှတ်ယူတယ်။ သင်ယူမှုဆိုတာ ဘဝတစ်လျှောက်လုံး ဆုံးခန်းတိုင်မဲ့ ဖြစ်စဥ် မဟုတ်ကြောင်း သိရှိလက်ခံထားကြတယ်။
◾ ကြိုးစားအားထုတ်မှုရဲ့ ရလဒ်ကို ယုံကြည်တယ်။ ကိုယ်ရည်ကိုယ်သွေး တိုးတက်ဖို့ရာ စိန်ခေါ်မှုတွေကို ရင်ဆိုင်ပြီး အရည်အချင်းနဲ့ ဗဟုသုတတွေကို အမြဲမပြတ် ဖြည့်ဆည်းနေတတ်သူတွေ ဖြစ်တယ်။
◾ ဝေဖန်အကြုံပြုချက်တွေကို တလေးတစား နားထောင်ပြီး ကိုယ့်အတွက် အသုံးဝင်ရင် ယူတယ်၊ အသုံးမဝင်ရင် ပယ်ချတယ်။ အမှားလုပ်မိသွားရင် ကိုယ့်ကိုယ်ကိုယ် အပြစ်တင်မဲ့အစား နောက်တစ်ခါ မမှားအောင် ပြင်ဆင်မွမ်းမံတယ်။
ဒီလောက်ဆိုရင် Fixed Mindset 🆚 Growth Mindset ဘာတွေကွာခြားလဲဆိုတာကို သိရှိသွားလောက်ပါပြီ။ ဒီစိတ်ထား ၂ ခုအကြောင်းက လေ့လာမယ်ဆိုရင် လေ့လာစရာ အများကြီးပါပဲ၊ စိတ်ဝင်စားဖို့လည်း ကောင်းပါတယ်။
အကယ်၍ အချိန်လည်းရမယ်၊ လေ့လာချင်စိတ်လည်း ရှိတယ်ဆိုရင်တော့ Growth Mindset အကြောင်း အမေရိကန် စိတ်ပညာရှင် Carol Dweck ပြောပြပေးထားတဲ့ အောက်ပါ ဗီဒီယီုလေးကို ကြည့်ရှုကြည့်ပါလို့ ညွှန်းဆိုပါရစေ။ 👇
[https://youtu.be/_X0mgOOSpLU?si=f5yt_lItLoEH5W11]
ညီငယ် ညီမငယ်တွေ အားလုံးပဲ တိုးတက်တဲ့စိတ်ထား လက်ကိုင်ထားခြင်းဖြင့် ကိုယ်ရေးကိုယ်တာဘဝမှာရော၊ ပညာရေးနဲ့ အလုပ်ခွင်မှာပါ အောင်မြင်မှုတွေကို ဆွတ်ခူးနိုင်ကြပါစေလို့ ဆန္ဒပြုလိုက်ပါတယ်။ 💙
